Barmaqlarda ağrı ilə müşayiət olunmayan şıqqıltı, adətən, hər hansı xəstəliyin əlaməti deyil və sümüklərin bir-birinə sürtünməsi və ya aşınması ilə əlaqəli olmur. 

Aztibb.az "Medikforum"a istinadən yazır ki, travmatoloq Mariya Avkopaşvilinin sözlərinə görə, barmaqların şıqqıldaması daha çox oynaq kapsulunun daxilində təzyiqin dəyişməsi və sinovial mayedəki qaz qabarcıqları ilə əlaqədardır.

“Barmaqların adi şıqqıltısı daha çox sümüklərin bir-birinə sürtünməsi və ya onları zədələməsi ilə bağlı deyil. Bəzi hallarda yaranan səslər vətərlərin və bağların ətraf toxumalara nisbətən hərəkəti nəticəsində də meydana çıxa bilər”, – deyə mütəxəssis bildirib.

Ekspert xəbərdarlıq edib ki, barmaqları bilərəkdən və kəskin hərəkətlərlə “yerinə salmağa” çalışmaq məsləhət deyil.

Ağrı, şişkinlik, qızartı, hərəkətlərdə məhdudiyyət, barmaqların deformasiyası, əlin gücünün azalması və ya oynaqlarda sərtlik həkimə müraciət etmək üçün əsas səbəblərdir.

Mütəxəssis qeyd edib ki, hava şəraiti artıq mövcud olan oynaq ağrılarını gücləndirə bilər, lakin özü-özlüyündə oynaq patologiyasının yaranmasına səbəb olmur.

Əgər narahatlıq və ağrı getdikcə artırsa, bununla yanaşı şişkinlik, qızartı və ya hərəkət məhdudiyyəti yaranırsa, mütləq mütəxəssisə müraciət etmək lazımdır.