Müasir tibdə böyrək daşlarının cərrahi müalicəsində açıq əməliyyatların yerini artıq böyük ölçüdə qapalı və minimal invaziv metodlar almışdır. Bu üsulların ən effektlilərindən biri hesab edilən perkutan nefrolitotomiya, yəni PCNL əməliyyatı, xüsusilə böyük və çıxarılması çətin olan daşlar üçün əsas seçim yoludur.

Aztibb.az xəbər verir ki, prosedur zamanı xəstənin bel nahiyəsindən dəridə təxminən bir santimetrlik kiçik kəsik açılır və rentgen və ya ultrasəs nəzarəti altında böyrəyə nazik bir borucuq yerləşdirilir. Həmin borucuq vasitəsilə daxil edilən optik kamera daşı birbaşa görməyə, xüsusi ultrasəs və ya lazer alətləri isə onu xırda hissələrə parçalayaraq bədəndən tamamilə çıxarmağa imkan verir.

Əməliyyatın tətbiq sahələri və üstünlükləri

Hər bir böyrək daşı bu cərrahi müdaxiləni tələb etmir, çünki müalicə növü hər pasiyent üçün fərdi olaraq seçilir. PCNL əsasən ölçüsü iki santimetrdən böyük olan, böyrək kasacıqlarını dolduran mərcanvari daşlarda və ya digər qırma üsullarının nəticə vermədiyi mürəkkəb hallarda tətbiq edilir. Geniş kəsiklərə ehtiyac qalmadığı üçün toxumaların zədələnməsi və qanaxma riski minimuma enir, əməliyyatdan sonrakı ağrılar isə xeyli az olur.

Pasientlər adətən bir-iki gün ərzində xəstəxanadan evə buraxılır və qısa müddətdə normal gündəlik həyatlarına qayıdırlar. Ən düzgün müalicə qərarı isə xəstənin ümumi sağlamlıq vəziyyəti, infeksiya riski və kompyuter tomoqrafiyasının nəticələri nəzərə alınaraq uroloq tərəfindən verilir.