Azərbaycan Tibb Universitetinin (ATU) Tibb və Stomatologiya ixtisasları üzrə təhsil alan tələbələri Türkiyənin nüfuzlu ali təhsil müəssisələrindən biri olan Ege Universitetində təşkil olunan bir aylıq Yay Məktəbi proqramında iştirak ediblər.

ATU-dan Aztibb.az-a bildirilib ki, beynəlxalq akademik əməkdaşlıq və tələbə mübadiləsi imkanlarının genişləndirilməsi istiqamətində həyata keçirilən proqram tələbələrin peşəkar bilik və bacarıqlarının inkişaf etdirilməsi, beynəlxalq təcrübə əldə etməsi və müxtəlif təhsil mühitləri ilə tanış olması baxımından əhəmiyyətli olub.

Proqram çərçivəsində ATU tələbələri Ege Universitetinin müvafiq fakültələrində təşkil olunan nəzəri və praktiki təlimlərdə iştirak edib, müasir tədris metodları və klinik yanaşmalarla tanış olublar. Tibb və Stomatologiya ixtisasları üzrə tələbələr öz ixtisaslarına uyğun akademik və praktiki fəaliyyətlərdə iştirak etməklə peşəkar dünyagörüşlərini genişləndiriblər.

ATU-nun Beynəlxalq əlaqələr şöbəsinin təşkilatçılığı ilə bir ay davam edən Yay Məktəbi proqramı tələbələrə yalnız akademik biliklərini artırmaq deyil, eyni zamanda beynəlxalq akademik mühitdə təcrübə qazanmaq, həmkarları ilə fikir mübadiləsi aparmaq və müxtəlif ölkələrdən olan tələbələrlə ünsiyyət qurmaq imkanı yaradıb.

Azərbaycan Tibb Universiteti tələbələrinin beynəlxalq təhsil proqramlarında iştirakının təmin edilməsi və xarici tərəfdaş universitetlərlə əməkdaşlığın inkişaf etdirilməsi universitetin beynəlmiləlləşmə strategiyasının əsas istiqamətlərindən biridir.

ATU və Ege Universiteti arasında mövcud akademik əməkdaşlığın gələcəkdə də genişləndirilməsi və tələbələr üçün yeni beynəlxalq təhsil imkanlarının yaradılması istiqamətində fəaliyyətlərin davam etdirilməsi nəzərdə tutulur.