Qeyri-Hökumət Təşkilatlarına Dövlət Dəstəyi Agentliyinin və TƏBİB-in dəstəyi, Hemofiliya və digər Hemostaz Pozuntuları Assosiasiyasının təşkilatçılığı ilə Şirvan Şəhər Mərkəzi Xəstəxanasında hemofiliya xəstəliyinə həsr olunmuş elmi-praktik seminar keçirilib.

Bu barədə Aztibb.az-a Şirvan ŞMX-dan xəbər verilib.

Bildirillib ki, “Hemofiliya xəstəliyinin müalicəsində beynəlxalq standartlara əsaslanan tibb bacısı işinin təşkili” mövzusunda keçirilən seminarın əsas məqsədi hemofiliyanın müalicəsi sahəsində həkim və tibb bacılarının bilik və bacarıqlarının artırılması, müasir müalicə yanaşmalarının tətbiqinin təşviq edilməsi olub.

Tədbirdə giriş nitqi ilə çıxış edən Şirvan Şəhər Mərkəzi Xəstəxanasının direktor vəzifəsini icra edən Zamin Fərziyev hemofiliya xəstələrinin keyfiyyətli və fasiləsiz tibbi xidmətlə təmin olunmasında peşəkar əməkdaşlığın və maarifləndirici tədbirlərin əhəmiyyətini vurğulayıb. O, həmçinin regionlarda yaşayan hemofiliya xəstələrinin zəruri dərman preparatları ilə təminatının və müasir müalicə imkanlarına əlçatanlığının artırılmasının vacibliyini diqqətə çatdırıb

Seminarda Hemofiliya və digər Hemostaz Pozuntuları Assosiasiyasının sədri Ayaz Hüseynov “Beynəlxalq təcrübəyə əsaslanan evdə müalicənin tətbiqi və faydası”, Respublika Klinik Xəstəxanasının Hematologiya şöbəsinin həkim- hematoloqu Aytac Novruzova “Hemofiliyanın multidissiplinar müalicə modeli”, Sumqayıt Hospitalının baş tibb bacısı Mirvarid Siracova “Hemofiliyanın müalicəsində tibb bacısının rolu”, MeciClub Təcili və Təxirəsalınmaz Tibbi Yardımın həkim-terapevti Məhəmməd Kərimli isə “Xarici və daxili qanaxmalar zamanı təcili tibbi yardım” mövzularında təqdimatlarla çıxış ediblər

Seminarın sonunda qanaxmalar zamanı ilkin müdaxilə ilə bağlı praktiki nümayiş keçirilib və iştirakçıları maraqlandıran suallar cavablandırılıb.

Layihənin əsas məqsədi hemofiliyanın ev şəraitində müalicə və profilaktikası modelinin təşviq edilməsi, pasiyentlərin həyat keyfiyyətinin yüksəldilməsi, eləcə də uşaqların fiziki məhdudiyyət və əlillik yaranmadan sağlam böyüməsinə töhfə verməkdir.