Harvard Tibb Məktəbinin alimləri tərəfindən aparılan və «Science Translational Medicine» jurnalında dərc olunan yeni tədqiqat kəllə sümüyü iliyinin xroniki ağrılardan əziyyət çəkən insanlarda mühüm rol oynadığını üzə çıxarıb.

Aztibb.az tədiqiqata dair məqaləyə istinadən yazır ki,  kəllə sümüyü ilə beyin qişasını birləşdirən mikrokanallar immunitet sisteminin regional cavab reaksiyasını təmin edir və bu mərkəzin aktivliyi patoloji proseslərdə birbaşa iştirak edir.

Tədqiqat çərçivəsində xroniki ağrısı (bel və diz osteoartriti) olan 125 nəfərin və nəzarət qrupundakı 22 sağlam şəxsin PET/MRT müayinələri müqayisə edilib. Nəticələr göstərib ki, xroniki ağrılardan əziyyət çəkənlərdə, xüsusilə alın və təpə nahiyələrində sümük iliyi hüceyrələrində bol olan translokator zülalının (TSPO) səviyyəsi nəzərəçarpacaq dərəcədə yüksəkdir. Ən güclü siqnal isə diz oynağı ağrısı olan pasiyentlərdə qeydə alınıb.

Mütəxəssislər aşkar ediblər ki, TSPO göstəricisinin yüksək olması ağrının intensivliyi, həmçinin təşviş və depressiya dərəcəsi ilə birbaşa korrelyasiya təşkil edir. Postmortal toxuma analizləri də xroniki ağrısı olan şəxsin kəllə sümüyü iliyində hüceyrə sayının və TSPO konsentrasiyasının iki dəfədən çox olduğunu təsdiqləyib.

Alimlərin qənaətinə görə, kəllə sümüyü iliyinin bu cür aktivləşməsi yalnız miqrenə xas deyil, bu, müxtəlif neyroiltihabi və xroniki ağrı vəziyyətləri üçün ümumi olan fundamental neyroimmun reaksiyadır.