Piylənmənin səbəbləri yalnız çox yeməklə bağlı deyil. Kaliforniya Universitetinin alimlərinin "Science Advances" jurnalında dərc olunan yeni araşdırması fruktozanın orqanizmdə yağların mənimsənilməsinə təsir edə biləcəyini göstərib.

Aztibb.az tədqiqata dair məqaləyə istinadən yazır ki, fruktozanın meyvələrdə, tərəvəzlərin bəzilərində və süfrə şəkərində təbii şəkildə mövcud olmasına baxmayaraq, müasir qidalanmada əlavə fruktoza mənbələrinə də ehtiyac duyulur. Onlardan biri yüksək fruktozalı qarğıdalı siropudur (HFCS) və bu maddə bir çox emal olunmuş məhsulda istifadə edilir.

Alimlər siçanlar üzərində apardıqları təcrübədə fruktozanın parçalanmasında iştirak edən KHK-C fermentini nazik bağırsaqda bloklayıblar. 12 həftə ərzində yüksək dozada HFCS verilən bu siçanlarda nəzarət qrupu ilə müqayisədə daha az çəki və yağ artımı müşahidə olunub.

Araşdırmaya görə, fruktozanın bağırsaqda metabolizmi bağırsaq mikrobiomuna, immun hüceyrələrinə və limfa damarlarının inkişafına təsir göstərir. Bu damarlar qida yağlarının mənimsənilməsində mühüm rol oynayır. Fruktozanın emalının qarşısının alınması isə yağların bağırsaqdan sorulmasını azaldıb.

Tədqiqatçılar həmçinin müəyyən ediblər ki, dəyişmiş bağırsaq mikrobiomu başqa siçanlara köçürüldükdə yağların mənimsənilməsində oxşar dəyişikliklər yaranıb.

Alimlər nəticələrin insanlarda da təsdiqlənməsi üçün əlavə araşdırmalara ehtiyac olduğunu vurğulayırlar. Bununla belə, araşdırma fruktozanın piylənməyə təsirinin sadəcə əlavə kalorilərlə məhdudlaşmadığını və onun bağırsaqda yağların mənimsənilməsini dəyişdirə biləcəyini göstərir.