Canadian Medical Association Journal (CMAJ) jurnalında dərc olunan məqalələrdə bildirilib ki, Ebola və hantavirus infeksiyaları ilkin mərhələdə qızdırma, əzələ ağrıları və baş ağrısı kimi qripə bənzər əlamətlərlə başladığı üçün erkən diaqnoz çətinləşə bilər.

Aztibb.az məqaləyə istinadən yazır ki, mütəxəssislərin sözlərinə görə, hantavirus əsasən yoluxmuş gəmiricilərlə təmas nəticəsində yayılır. Xüsusilə Andes ştammı digər növlərdən fərqli olaraq insandan insana, o cümlədən hava-damcı yolu ilə keçə bilir. Hazırda hantavirusa qarşı təsdiqlənmiş spesifik vaksin və ya antiviral müalicə mövcud deyil. Müalicə əsasən ağır ürək-ağciyər və ya böyrək ağırlaşmalarının qarşısını almağa yönəlmiş dəstəkləyici terapiyadan ibarətdir.

Ebola virusunun təbii daşıyıcıları meyvə yarasaları hesab olunur. Yoluxma yoluxmuş şəxsin bioloji mayeləri və çirklənmiş səthlərlə təmas nəticəsində baş verir. Hazırda Zair ştammına qarşı antiviral preparatlar və vaksin sayəsində ölüm göstəricisi əhəmiyyətli dərəcədə azaldılıb.

Bununla belə, hazırda Konqo Demokratik Respublikasında qeydə alınan yoluxmalar Bundibuqyo ştammı ilə əlaqələndirilir. Bu ştamma qarşı hələlik rəsmi təsdiqlənmiş vaksin yoxdur və ölüm faizi 50 faizə çata bilir. Alimlər vurğulayırlar ki, bu hallarda erkən diaqnoz, xəstənin vaxtında təcrid olunması və ixtisaslaşmış infeksion yardım həyati əhəmiyyət daşıyır.