Yaponiyalı alimlərin apardıqları riyazi modelləşdirmə göstərib ki, Ebola virusuna yoluxmuş şəxslər yaxın 30 gün ərzində Konqo Demokratik Respublikası və Uqandadan Avropa və Yaxın Şərqin ən böyük hava nəqliyyatı mərkəzlərinə çata bilərlər.

Aztibb.az  "NBC news" nəşrinə istinadən yazır ki, araşdırmanın nəticələrinə görə, ən azı bir yoluxmuş sərnişinin ölkəyə daxil olma ehtimalı Belçika üçün 92%, Fransa üçün 91%, BƏƏ üçün 88%, Türkiyə üçün isə 86% təşkil edir.

Tədqiqat müəllifləri bildiriblər ki, bu proqnozlar beynəlxalq epidemioloji vəziyyətin operativ monitorinqi üçün əsas yaradır. Bununla belə, virusa yoluxmuş şəxsin ölkəyə daxil olması həmin ərazidə infeksiyanın yayılacağı anlamına gəlmir.

Araşdırma 569 mindən çox aviareys marşrutu və 330 milyon sərnişin haqqında məlumatların təhlili əsasında hazırlanıb. Alimlərin fikrincə, Ebola xəstələrinin 65 faizə qədəri uzun inkubasiya dövrünə görə hava limanlarında aparılan nəzarətdən yayınaraq aşkarlanmaya bilər. Çünki bu mərhələdə xəstəliyin əlamətləri hələ özünü göstərmir.

Mütəxəssislər xatırladırlar ki, Ebola virusu yalnız yoluxmuş şəxsin bioloji mayeləri ilə sıx təmas nəticəsində ötürülür və hava-damcı yolu ilə yayılmır.

Ekspertlər risk zonalarından gələn sərnişinlər üzərində nəzarətin gücləndirilməsini tövsiyə etsələr də, hazırda təşviş üçün ciddi əsas olmadığını, əsas məqsədin səhiyyə xidmətlərinin mümkün risklərə hazır vəziyyətdə saxlanılması olduğunu vurğulayırlar.