Rusiyada Ebola qızdırmasının yeni ştamına qarşı vaksin artıq hazırlanıb.

Aztibb.az "Life" portalına istinadən yazır ki, bu barədə Rusiya Federasiyasının səhiyyə naziri Mixail Muraşko Sankt-Peterburq Beynəlxalq İqtisadi Forumu çərçivəsində bildirib.

Nazirin sözlərinə görə, əvvəllər Qamalei adına institut Ebola profilaktikası üçün vaksin hazırlamışdı. Yeni ştamın ortaya çıxmasından sonra mütəxəssislər preparatı dəyişmiş virus variantına uyğunlaşdırıblar.

M.Muraşko bildirib ki, hazırda vaksin artıq hazır məhsul formatındadır. Lakin onun dərhal istifadəsi mümkün deyil: preparat hələ zəruri sınaq mərhələlərindən keçməlidir. Nazir vurğulayıb ki, söhbət Ebola əleyhinə mövcud Rusiya vaksininin məhz adaptasiya olunmuş versiyasından gedir.