Rusiya Elmlər Akademiyasının Arxivində müharibə illərində yerli alimlərin hazırladıqları layihələrə dair yeni aşkar edilmiş sənədlər açıqlanıb. Bu ixtiraların bir çoxu sadə görünməsinə baxmayaraq, Qələbənin qazanılmasına mühüm töhfə verib.

Aztibb.az xəbər verir ki, “İzvestiya” qəzeti Böyük Vətən müharibəsi dövründə sovet alimlərinin hazırladıqları ən maraqlı elmi yeniliklərlə bağlı arxiv materiallarını təqdim edib.

Həmin işləmələr sırasında şaxtalı havalarda tankların qızdırılması üçün alovsuz briketlər, oksigen, yonqar və mamır əsasında hazırlanan partlayıcı maddələr, həmçinin yoluxdurulmuş siçanların ağciyərlərindən əldə edilən vaksinlər yer alır.

Ekspertlərin fikrincə, cəbhə şəraitində tətbiq edilən çoxsaylı ixtiralar olmasaydı, müharibənin müddəti xeyli daha uzun çəkə bilərdi.

Müharibə dövrü hərbi həkimlərinin ən diqqətçəkən tapıntılarından biri isə blokada şəraitində olan Leninqradda hazırlanan səpkili yatalaq vaksini idi. Vaksinin müəllifləri Paste adına Epidemiologiya və Mikrobiologiya İnstitutunun alimləri olub.

Ağır sanitar vəziyyət şəhərdə ən təhlükəli və ölümcül epidemiyalardan biri hesab olunan səpkili yatalağın sürətlə yayılmasına səbəb olurdu. Eyni zamanda vaksinlərin klassik istehsal üsulları çoxlu sayda dovşan və digər iri heyvanlar tələb edirdi ki, həmin dövrdə onların çatışmazlığı ciddi problem idi.

Buna görə də alimlər 1942-ci ildə xəstəlik törədicisi ilə yoluxdurulmuş siçanların ağciyər toxuması əsasında vaksin istehsalını mənimsədilər. Hazırlanan preparat hərbçilərin, həkimlərin, müdafiə müəssisələrinin əməkdaşlarının və uşaq evlərində yaşayan uşaqların immunlaşdırılması üçün istifadə olunurdu.

 Blokada dövründə institut faktiki olaraq “epidemiyaya qarşı qərargah”a çevrilmişdi. Görülən tədbirlər nəticəsində şəhərdə kütləvi epidemiyaların qarşısını almaq mümkün olmuşdu.