Ağcabədi Rayon Mərkəzi Xəstəxanasının həkim–cərrahı Azad Hüseynov Aztibb.az-a öd daşı xəstəliyi barədə məlumat verib.
Həkim bildirib ki, öd daşı xəstəliyi (xolesistit və ya xolesistolitiaz) öd kisəsində sərtləşmiş duz və xolesterin yığıntılarının əmələ gəlməsi ilə yaranan ciddi bir problemdir. Bu daşlar uzun müddət heç bir əlamət verməyə bilər, lakin hərəkət etdikdə və öd axınını blokladıqda kəskin ağrılar və ağırlaşmalar yarada bilər.
Azad Hüseynov qeyd edib ki, öd daşı xəstəliyinin ən tipik əlaməti sağ qabırğaaltı nahiyədə qəfil başlayan, sağ çiyinə və kürəyə vurub yayılan kəskin ağrıdır. Bu ağrı adətən yağlı yeməklərdən sonra artır. Bundan başqa, ürəkbulanma, qusma, ağızda acı dad, köp və həzm pozğunluğu da tez-tez müşahidə edilir.
Onun sözlərinə görə, öd daşlarının yaranmasına təsir edən əsas risk faktorları bunlardır:
* Yağlı və nizamsız qidalanma
* Xolesterinin yüksək olması
* Piylənmə
* Hormonal dəyişikliklər
* Uzunmüddətli aclıq və ya çox sürətli arıqlama
* Genetik meyillilik
Azad Hüseynov qeyd edib ki, xəstəliyin diaqnostikasında ən etibarlı üsul ultrasəs müayinəsidir. Müalicə isə daşın ölçüsü, sayı və yaratdığı fəsadlardan asılı olaraq təyin edilir. Kiçik daşlar bəzən sxematik müalicə ilə nəzarətdə saxlanıla bilər, lakin əksər hallarda ən effektiv və təhlükəsiz həll laparoskopik cərrahi müdaxilə — öd kisəsinin çıxarılmasıdır.
Həkim vurğulayıb ki, öd daşı xəstəliyinin vaxtında aşkar olunmaması kəskin iltihab, öd yollarının tutulması, pankreatit və digər ağırlaşmalara səbəb ola bilər. Buna görə də uzunmüddətli sağ qabırğaaltı ağrılar, həzm pozğunluğu və acı dad kimi əlamətlər hiss edildikdə gecikmədən mütəxəssisə müraciət etmək vacibdir.
