Tədris Cərrahiyyə Klinikasında adenoid vegetasiyası və xroniki tonzillitdən əziyyət çəkən pasiyentlərdə uğurlu cərrahi əməliyyatlar icra olunur.

 

ATU-nun Qulaq, burun və boğaz xəstəlikləri kafedrasının dosenti, Tədris Cərrahiyyə Klinikasının Otorinolorinqologiya şöbəsinin cərrahı Cabbar Cəlilov Aztibb.az-a bildirib ki, adenotomiya əməliyyatı burun-udlaq nahiyəsində yerləşən adenoid vegetasiyasının hipertrofiyası zamanı tətbiq edilir və ümumi anesteziya altında həyata keçirilir. Bu xəstələrin əsas şikayətləri burun tənəffüsünün çətinləşməsi, gecə xoruldama və bəzi hallarda gecə apnoeları olur.

Həkimin sözlərinə görə, xüsusilə gecə apnoesi müşahidə olunan uşaqlarda əməliyyat həyati göstəriş hesab edilir. Ən kiçik əməliyyat olunan pasiyentin 2 yaş yarım, ən böyük pasiyentin isə 42 yaşında olduğu qeyd edilib.

 

Dosent C.Cəlilov həmçinin bildirib ki, xroniki tonzillitdən əziyyət çəkən xəstələrdə tonsillektomiya əməliyyatı həyata keçirilir. Bu xəstələr adətən tez-tez təkrarlanan angina, xroniki yorğunluq, halsızlıq və oynaq ağrıları şikayətləri ilə müraciət edirlər.

 

Əməliyyatların xəstənin toxuma xüsusiyyətindən asılı olaraq müxtəlif üsullarla – klassik və ya kouter vasitəsilə icra olunduğunu deyən həkim qeyd edib ki, planlı şəkildə aparılan bu əməliyyatlarda ciddi fəsadlara nadir hallarda rast gəlinir. Ən çox müşahidə olunan hal əməliyyatdan sonrakı qanaxmalar olsa da, düzgün qulluq və tibbi tövsiyələrə əməl olunduqda bu risk minimuma enir.

 

Mütəxəssis həmçinin yay aylarında bu tip əməliyyatların aparılmasının təhlükəli olması ilə bağlı yayılan fikirlərin doğru olmadığını bildirib. Onun sözlərinə görə, müasir şərait və düzgün nəzarət sayəsində əməliyyatdan sonrakı dövr təhlükəsiz şəkildə keçirilir.