Kolposkopiya qadın sağlamlığının qorunmasında mühüm rol oynayan müayinə üsullarından biridir. Bu müayinə zamanı uşaqlıq boynu xüsusi optik cihaz vasitəsilə böyüdülərək daha detallı qiymətləndirilir.

Bu barədə Aztibb.az-a məlumat verən ATU-nun I Mamalıq-ginekologiya kafedrasının dosenti, Tədris Cərrahiyyə Klinikasının ginekoloqu Sevinc İsmayılova bildirib ki, kolposkopiya əsasən PAP-test nəticələrində dəyişiklik aşkar olunduqda, HPV infeksiyasına şübhə yarandıqda, uşaqlıq boynunda yara və ya digər patoloji hallar müşahidə edildikdə təyin edilir. Müayinə ağrısızdır, qısa müddətdə aparılır və problemlərin erkən mərhələdə aşkarlanmasına imkan yaradır.

Sevinc İsmayılova qeyd edib ki, qadınlar xüsusilə aktiv cinsi həyata başladıqdan sonra mütəmadi ginekoloji müayinədən keçməlidirlər. Adətən, 21 yaşdan sonra PAP-test və ginekoloji yoxlanışlar tövsiyə olunur. Əgər analizlərdə dəyişiklik aşkarlanarsa, həkim əlavə olaraq kolposkopiya məsləhət görə bilər.

Həkim vurğulayıb ki, uşaqlıq boynu xərçəngönü xəstəliklərinin erkən aşkarlanması gələcəkdə ciddi fəsadların qarşısının alınmasında mühüm əhəmiyyət daşıyır. Buna görə də qadınlara profilaktik müayinələri gecikdirməmək tövsiyə olunur.