Azərbaycan Tibb Universitetinin (ATU) Qidalanma və tibbi ekologiya kafedrasının müdiri, dosent Fəridə Əli Bakıda keçirilən BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində təşkil olunmuş tədbirdə iştirak edib.  

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi və Beynəlxalq Avrasiya Mətbuat Fondunun (BAMF) təşkilatçılığı ilə baş tutan “Sirkulyar və yaşıl iqtisadiyyata keçid: dayanıqlı şəhərsalma çağırışları və imkanları” adlı tədbirdə ATU əməkdaşı  “Şəhərsalma və insan sağlamlığı” mövzusunda çıxış edib.

ATU-dan Aztibb.az-a verilən məlumata görə, məruzəçi çıxışında  “Ekoloji təhlükəsizlik” anlayışı, şəhərsalma prosesinin əhalinin sağlamlığının qorunmasına yönəlmiş strateji yanaşma tələb etməsi, bu sahədə aparılan ekoloji tədqiqatlar kimi mühüm aspektlərə toxunub. Natiq bildirib ki, müasir şəhərsalma prosesi sadəcə mühəndislik və memarlıq fəaliyyəti deyil, mahiyətcə daha genişmiqyaslı tibbi-profilaktik və strateji ictimai səhiyyə konsepsiyası kimi qəbul edilməlidir. Həmçinin yeni yaşayış komplekslərinin inşası zamanı layihələrdə “hava dəhlizləri”nin qurulması və planlaşdırmanın profilaktik təbabət prinsiplərinə əsaslanaraq hazırlanması şəhərsalmanın mütləq şərtlərindən biri kimi nəzərdə tutulmalıdır.

Şəhərsalma və insan sağlamlığı ilə bağlı konkret və aktual məsələləri önə çəkən ATU əməkdaşının çıxışı tədbir iştirakçıları tərəfindən böyük maraqla qarşılanıb.

Böyük Metropolislərin Dünya Assosiasiyasının Baş katibliyinin siyasət üzrə məsul əməkdaşı Oskar Nunyez, Azərbaycan Dövlət  İqtisad Universitetinin İqtisadi Araşdırmalar İnstitutunun direktor müavini Zahid Fərrux Məmmədov, Xəzər Universitetinin Dünya iqtisadiyyatı üzrə doktorantı, araşdırmaçı-yazıçı Nik Nvolisanın da çıxış etdiyi tədbir interaktiv sual-cavab sessiyası ilə yekunlaşıb.