ATU-nun Tədris Cərrahiyyə Klinikasında 65 yaşlı qadın pasiyent üzərində mürəkkəb açıq ürək əməliyyatı uğurla həyata keçirilib.

 

Klinikadan Aztibb.az-a verilən məlumata görə, əməliyyat klinikanın ürək-damar cərrahı, dosent Mirəli Məcidovin rəhbərliyi ilə icra olunub.

 

Pasiyent klinikaya əsasən təngnəfəslik, fiziki hərəkət zamanı yorğunluq və ara-sıra yaranan ürəkdöyünmə şikayətləri ilə müraciət edib. Aparılan geniş müayinələr və exokardioqrafiya nəticəsində xəstədə ciddi mitral qapaq darlığı aşkarlanıb.

 

Dosent Mirəli Məcidov bildirib ki, pasiyentin yaşı nəzərə alınaraq ilkin mərhələdə koronar angioqrafiya icra olunub. Müayinənin nəticələrinə əsasən koronar damarlarda ciddi problem aşkarlanmadığından yalnız mitral qapağa cərrahi müdaxilə qərarı verilib.

 

Əməliyyat ümumi anesteziya altında aparılıb. Median sternotomiya üsulu ilə döş qəfəsi açıldıqdan sonra xəstə süni qan dövranı aparatına qoşulub və ürək müvəqqəti dayandırılıb. Təftiş zamanı mitral qapağın ciddi kalsifikasiyaya uğradığı və qapaq darlığının ağır olduğu müəyyən edilib. Zədələnmiş qapaq tam şəkildə çıxarılıb və onun yerinə mexaniki mitral klapan implantasiya olunub.

Cərrahi müdaxilə uğurla başa çatıb. Pasiyent əməliyyatdan sonrakı dövrü stabil keçirərək sağlam vəziyyətdə evə buraxılıb.

 

Dosent Mirəli Məcidov qeyd edib ki, mitral qapaq stenozu ən çox uşaqlıq dövründə keçirilmiş revmatizmin fəsadı kimi ortaya çıxır. Vaxtında düzgün müalicə və mütəmadi exokardioqrafik nəzarət aparılmadıqda qapaq aparatında ciddi zədələnmə yaranır və nəticədə mitral qapaq çatışmazlığı və ya stenoz inkişaf edir. Onun sözlərinə görə, bu cür qapaq patologiyalarının bir hissəsi anadangəlmə olsa da, əksər hallarda sonradan qazanılmış ürək qüsurları üstünlük təşkil edir.