“Əhalidən çox xahiş edirik, koronavirusa yoluxma hiss edərlərsə, xəstəliyin ilk dövrlərində həkimə müraciət etsinlər. Evdə də müalicə oluna bilərlər, lakin bu zaman müalicə həkim nəzarəti altında aparılmalıdır. Bu xəstəliyin spesifik müalicəsi yoxdur, amma simptomatik müalicə təyin oluna bilər. Əgər xəstəliyin gedişində ağırlaşma olarsa, xəstə həkimin göstərişi ilə xəstəxanaya yerləşdirilə bilər”.

Bu barədə Səhiyyə Nazirliyinin İşçi qrupunun üzvü Nailə Daşdəmirova AZTV-yə müsahibəsində bildirib.

O qeyd edib ki, evdə müalicə alan xəstələr şərait imkan verirsə, digər ailə üzvlərindən təcrid olunmalı, başqa otaqda yerləşdirilməlidirlər: “İmmuniteti möhkəm olan ailə üzvü maska və əlcəkdən istifadə edərək, dezinfeksiya qaydalarına əməl etməklə xəstəyə qulluq etməlidir. Bacardıqca sosial məsafəni gözləmək lazımdır. Səthlər dezinfeksiya olunmalı, xəstənin yatağı tez-tez dəyişdirilməli, otaq yaxşı havalandırılmalıdır. Yataq dəyişdirilən zaman onu digər ailə üzvlərinin çamaşırları ilə birlikdə yumaq olmaz”.

Həkim həmçinin bildirib ki, əgər xəstədə heç bir əlamət müşahidə olunmursa, ağciyərlərin KT-sinə ehtiyac yoxdur. 3 gündən artıq yüksək temperatur KT olunmaq üçün göstəriş ola bilər.

“Həm COVID-19, həm də müharibənin olması əhalinin psixoloji vəziyyətinə ciddi təsir edib. Hazırda bu vəziyyət nəzərə alınmalı, əhaliyə psixoloji yardım da göstərilməlidir. Biz birlikdə olsaq, bu virusa qalib hələ bilərik. Bir az məsuliyyəti artıraq, deyilən qaydalara riayət edək, kütləvi toplaşmalardan qaçaq. Hər şey özümüzdən asılıdır”.

Səhiyyə Nazirliyinin rəsmisi həmçinin əlavə edib ki, son günlər ölkə ərazisində koronavirusa yoluxma sayında müşahidə olunan kəskin artım səhiyyə sisteminin yüklənməsinə səbəb olub. Nazirlik ambulator və poliklinik xidməti yüksəltməklə bu yükü bir qədər azaltmaq niyyətindədir.