Ümumdünya Səhiyyə Təşkilatının (ÜST) beynəlxalq ekspert və mentorları Azərbaycanda səfərdə olub

TƏBİB-dən Aztibb.az-a bildirilib ki, 23-25 iyul tarixlərində baş tutan səfərin əsas məqsədi ölkəmizdə Beynəlxalq Təcili Tibbi Yardım Briqadasının (BTTYB) formalaşdırılmasına dəstək göstərməkdir.

Missiya çərçivəsində Azərbaycan Respublikası Fövqəladə Hallar Nazirliyi, Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB ilə görüşlər keçirilib. Ekspertlər yerləşdirmə məntəqələrinə, dərman anbarlarına və texniki avadanlıqlara baxış keçirərək, logistika, sanitariya və texniki standartlar üzrə qiymətləndirmə aparıblar.

Səfərin sonunda ÜST-nin dəstəyi ilə dəyirmi masa təşkil olunub və Azərbaycanın BTTYB üzrə yol xəritəsinin müəyyənləşdirilməsi istiqamətində fikir mübadiləsi aparılıb.

Qeyd edək ki, bu təşəbbüs cənab Prezidentin tapşırığına əsasən həyata keçirilir və milli, eləcə də beynəlxalq səviyyədə sağlamlıq təhlükəsizliyinin gücləndirilməsini hədəfləyir.

Formalaşdırılması nəzərdə tutulan yerli briqada zəlzələ, epidemiya və digər fövqəladə hallarda çevik, operativ və effektiv tibbi xidmət göstərmək məqsədi daşıyır. Sertifikatlaşdırıldıqdan sonra briqadanın həm ölkə daxilində, həm də beynəlxalq səviyyədə fəaliyyət göstərməsi nəzərdə tutulur.

ÜST bu prosesə mentorluq, təlim və beynəlxalq təcrübə mübadiləsi ilə dəstəyini davam etdirir.