Vaşinqton Universiteti tədqiqatçıları tərəfindən aparılan araşdırmanın nəticələrinə görə, koronavirus daha az öldürməyə başlayıb.

Aztibb.az medimagazin.com.tr-yə istinadla xəbər verir ki, Sağlamlıq Tədbirləri və Qiymətləndirmə İnstitutunun tədqiqatçıları COVID-19-un aprel ayında 0,9 faiz olan ölüm nisbətinin noyabr ayına qədər 0,6 faizə düşdüyünü aşkar ediblər.

Başqa sözlə, bu virusa yoluxmuş hər min nəfərdən doqquzu aprel ayında öldüyü halda, bu rəqəm noyabr ayında altıya düşüb.

Mövzu ilə əlaqədar açıqlama verən İnstitut direktoru Kristofer Murrey həkimlərin virusla əvvəlkindən daha yaxşı mübarizə apardığını bildirib.

Həkim K. Murrey ölüm statistikasına nəzər salındığında yaşlıların hələ də risk qrupunda olduğunu qeyd edib: "Ölüm riskinin yaşla əlaqəsi mövcuddur. Ölüm riski hər yaş üçün 9 faiz artır".