İtaliyada Sars-Cov-2 koronavirusu 2019-cu ilin sentyabr ayında yayılmağa başlayıb: həmin ay analiz üçün götürülən qanda koronavirusa qarşı anti-cisimlər aşkarlanıb.

Aztibb.az www.interfax.ru saytına istinadla xəbər verir ki, bu barədə Milan Onkologiya İnstitutunun və Siena Universitetinin məruzəsində deyilir.

“Biz 2019-cu ilin sentyabrından 2020-ci ilin mart ayına qədər olan dövr ərzində ağ ciyər şişi üzrə analiz verən 959 insanın qan nümunələrini tədqiq etdik və 111nəfərdə (11,6 faiz) koronavirusun mövcudluğu ilə bağlı spesifik anti-cisimlər aşkarladıq”, - deyə sənəddə bildirilir.

Tədqiqatlar zamanı ən çox yoluxma hallarının Lombardiyada, sonra isə Pyemont, Latsio, Emiliya-Romanya, Toskana və Veneto əyalətlərində yayıldığı məlum olub. Belə çıxır ki, ölkədə COVID-19 infeksiyasının simptomsuz halları hələ rəsmən qeydə alınan “ilk pasiyentdən” xeyli əvvəl mövcud imiş.

Əvvəllər belə hesab edilirdi ki, yeni koronavirus 2019-cu ilin dekabrında Uxanda meydana gəlib və ilk yoluxma halları şəhərin mərkəzində yerləşən bazarda baş verib. Lakin indiyə qədər də “Hunan” bazarının infeksiyanın mənbəyi olması barədə təsdiqlənmiş məlumat yoxdur.