Azərbaycan Tibb Universitetinin Tibbi mikrobiologiya və immunologiya kafedrasının dosenti Fəxrəddin Şıxəliyevin “Xüsusi mikrobiologiya” dərsliyi işıq üzü görüb.

Aztibb.az-ın məlumatına görə, AMEA-nın Mikrobiologiya institutunun baş direktoru, AMEA-nın müxbir üzvü Pənah Muradov və ATU-nun Yoluxucu xəstəliklər kafedrasının müdiri, dosent C.İsayevin rəyçiliyi ilə ərsəyə gələn, Ön söz və 17 fəsildən ibarət olan 668 səhifəlik dərslik ATU-nun “Təbib” nəşriyyatında çap edilib. 

Kitabda insan orqanizmində müxtəlif xəstəliklər törədən patogen və şərti-patogen mikroorqanizmlərin (bakteriyalar, göbələklər, ibtidailər, viruslar) morfologiyası, antigen quruluşlu, patogenetik amilləri, xarici mühitdə yayılması və davamlılığı, heyvanlar üçün patogenliyi, infeksiya mənbəyi və yoluxma yolları, patogenez və klinikası, immuniteti, mikrobioloji diaqnostikası, müalicəsi və profilaktikası haqda geniş şərh verilib.  

Dərsliyin hazırlanmasına ciddi əmək sərf olunub. Belə ki, müasir tələblər əsas götürülərək, diaqnostika üsulları, laborator aparatlar, ləvazimatlar və s. göstərilməklə, yüzlərlə şəkil, sxem və cədvəllərə yer verilib.

Qeyd edək ki, bu universal dərslik Azərbaycan Tibb Universitetinin bütün fakültələrinin tələbələrinə tədris edilən fənnin proqramına uyğun olaraq yazılıb. Kitab ATU-nun Böyük Elmi Şurasının qərarı əsasında çap edilib.