Elm və Təhsil Nazirliyinin İnformasiya Texnologiyaları İnstitutunda iki struktur bölmənin “Qlobal çağırışlar kontekstində təcili tibbi yardım xidmətində kiberfiziki geosistemlərin yaradılmasının konseptual əsasları” mövzusuna həsr olunmuş birgə elmi seminarı keçirilib.

İnstitutdan Aztibb.az-a bildirilib ki, məruzəni təqdim edən Multimedia Texnologiyaları Mərkəzinin rəhbəri Anar Səmidov kiberfiziki geosistemlərin təcili tibbi yardım xidmətlərini təkmilləşdirmək üçün tətbiq edilən informasiya texnologiyaları, geoməkan məlumatları və tibbi yardımı birləşdirən innovativ yanaşma metodlarını diqqətə çatdırıb. Onun sözlərinə görə, bu sistemlər xəstələrin yerləşdiyi yerlər, tibbi resurslar və yol şəraiti haqqında məlumatların səmərəli toplanmasına, təhlilinə və ötürülməsinə imkan verir ki, bu da tibbi vəziyyətlərə sürətli və dəqiq cavab verməyə kömək edir.

Məruzəçi qeyd edib ki, tədqiqat işinin məqsədi təcili tibbi yardımda kiberfiziki geosistemlərin yaradılması üçün istifadə olunan texnologiyaları və metodları nəzərdən keçirmək və onların effektivliyini araşdırmaqdan ibarətdir. Müasir tibb və ictimai səhiyyə kontekstində mühüm nəticələrə malik olan tədqiqat işi kiberfiziki geosistemlərin uğurla həyata keçirilməsi və inkişafı üçün tibb müəssisələri və dövlət qurumlarının birgə səylərinin vacibliyini önə çəkir. O, əlavə edib ki, təcili tibbi yardım xidmətlərinin qarşılaşa biləcəyi çatışmazlıqların aradan qaldırılması koordinasiya, maliyyə, texniki təchizat və kadr hazırlığının təkmilləşdirilməsini tələb edir: “Kiberfiziki geosistemlərin tətbiqi təcili tibbi yardım xidmətlərinin səmərəliliyini və əlçatanlığını yaxşılaşdırmağa kömək edə bilər”.

A.Səmidov kiberfiziki geosistemin yaradılması metodologiyasını təqdim edib, təcili tibbi yardım sistemində kiberfiziki geosistemlərdən istifadənin reaksiya vaxtının azaldılması, koordinasiyanın yaxşılaşdırılması, marşrutun optimallaşdırılması, teletibbin həyata keçirilməsi kimi əhəmiyyətli üstünlüklərinin müəyyən edildiyini vurğulayıb. O, həmçinin kiberfiziki geosistemlərin təcili tibbi yardım xidmətlərində tətbiqinin üstünlükləri ilə yanaşı, məlumatların məxfiliyi, texniki çətinliklər və maliyyələşmə ilə bağlı bir sıra məhdudiyyətlərin olduğuna da diqqət çəkib.

Sonda A.Səmidov qeyd edib ki, süni intellekt və data analitika kimi yeni texnologiyaların tətbiqi kiberfiziki geosistemlərin funksionallığını təkmilləşdirə və sistemin daha səmərəli işləməsinə kömək edə bilər.

AMEA-nın vitse-prezidenti, institutun baş direktoru, akademik Rasim Əliquliyev məruzəyə dair təklif və tövsiyələrini səsləndirib. Akademik R.Əliquliyev ən son texnologiyaların imkanlarından istifadə etməklə təcili tibbi yardım xidmətinin müasir dövrün tələblərinə uyğun təşkilinə dair beynəlxalq təcrübənin, bu istiqamətdə keçirilmiş konfransların, tədris materiallarının və problemlərin daha dərindən araşdırılmasının vacibliyini qeyd edib. Alim, həmçinin təcili tibbi yardım xidmətinin səmərəli təşkili zamanı onun dayanıqlı enerji təminatına malik olması ilə bağlı təkliflərin işlənilməsinin əhəmiyyətinə toxunub.