Rusiyada uşaqlar işlətmə dərmanlarının köməyi ilə arıqlamağa başlayıblar və xəstəxanalara yerləşdiriliblər.

Aztibb.az bu barədə “İzvestiya”ya istinadən məlumat yayıb.

Məktəbli qızlar arasında həyəcanlı dəb yaranıb. Arıqlamaq üçün bu üsul TikTok videolarında təsvir edilib. Xüsusilə, "Bisacodyl" və "Furosemid" dərmanlarını qəbul etmək tövsiyə olunur. Ancaq bu cür videolarda mümkün yan təsirlər barədə heç nə qeyd olunmur və bu, qızların sağlamlıq problemləri ilə bağlı xəstəxanaya yerləşdirilməsinə səbəb olub.

Əldə olan məlumatlara görə, ilin əvvəlindən bu səbəbdən xəstəxanaya yerləşdirilənlərin sayı artır. Müntəzəm olaraq işlətmə dərmanı qəbul edən məktəbli qızların ürəklərində və mədə-bağırsaq traktında problemlər yaranır.

Psixoloq Roman Tsvetkov belə uşaqların valideynlərinə problemlərin öhdəsindən gəlməyə kömək etməyi məsləhət görüb. O xatırladıb ki, yeniyetmələr ictimai rəydən asılıdır və çox vaxt informasiyanı tənqidi şəkildə qəbul edə bilmirlər.

Valideynlər övladlarının əlindən kompüter və telefon almamalı, əksinə, onlarla etibarlı münasibətlər qurmalı və onlara informasiya axınının öhdəsindən gəlməyə və birlikdə təhlil etməyə kömək etməlidirlər.