Türkiyəli alimlər dünya əhalisinin üçdə birinin vərəm bakteriyasına yoluxduğunu bildirib.

Aztibb.az "CNN Türk"ə istinadfən yazır ki, bəşər tarixi qədər qədim olan vərəm keçmişdə çoxlu epidemiyalara və milyonlarla insanın ölümünə səbəb olub. XIX əsrdə sənayeləşmiş ölkələrdə epidemiyalar baş verərkən vərəm mikrobunun (M.Tuberculosis) kəşfi ilə xəstəliyin diaqnostika və müalicəsində yeni üsullar işlənib hazırlanmışdır.

1882-ci ildə bakteriyaları kəşf edən Dr. Robert Koxun xatirəsinə Ümumdünya Səhiyyə Təşkilatı (ÜST) bu xəstəlik haqqında məlumatlılığın artırılması məqsədi ilə 24 mart tarixini Ümumdünya Vərəmlə Mübarizə Günü elan edib. 

Alimlər vərəmin əlamətlərini və yoluxma yollarını açıqlayıb. Vərəm ən çox ağciyərlərə təsir etsə də, bədənin digər orqanlarına da təsir edə bilər. Semptomlar arasında uzun sürən öskürək, xüsusilə 2-3 həftədən uzun sürən öskürək, bəlğəm, qızdırma, gecə tərləmələri, kilo itkisi və halsızlıq var. Xəstəlik, danışıq zamanı və ya infeksiya zamanı havaya buraxılan damcılar və tənəffüs yolu ilə ötürülür.