Slovakiya hökuməti koronavirus pandemiyası ilə əlaqədar qüvvədə olan xüsusi vəziyyət rejiminin müddətinin dekabrın 29-dək uzadılması barədə qərar qəbul edib.

Aztibb.az xəbər verir ki, Slovakiya ümumölkə testləri sayəsində iqtisadiyyatı və gündəlik həyatı işlək vəziyyətdə saxlayacağını elan edib. Digər Avropa ölkələrindən fərqli olaraq, burada ibtidai məktəblər, ticarət obyektləri və müəssisələr fəaliyyətlərini davam etdirirlər.

Pandemiyanın ilk dalğasının demək olar ki, yan keçdiyi Slovakiyada payız aylarında yoluxma halları sürətlə artmağa başlayıb. Hazırda 5,5 milyon əhalisi olan ölkədə 79181 nəfərin virusa yoluxduğu təsdiqlənib. Xəstəliklərin Profilaktikası və Nəzarəti üzrə Avropa Mərkəzinin məlumatına görə, Slovakiyada 14 gün ərzində hər 100 min sakinə düşən yeni yoluxma halı 570-ə bərabər olub.