Damaq yarığının bağlanması əməliyyatlarından sonra yaranan ikincili damaq defektləri bu gün də tibbin aktual problemlərindən biri olaraq qalır. Əvvəllər bu cür əməliyyatların nəticəsində residiv defektlərin yaranma faizi 70%-ə qədər idisə, hazırda bu göstərici 3-25% arasında dəyişir.

Aztibb.az xəbər verir ki, tibb üzrə fəlsəfə doktoru Xəyalə Aşurbəylinin sözlərinə görə, ikincili damaq defektlərinin bir çox yaranma səbəbləri vardır: " Əməliyyatın planlaşdırılmasında buraxılan səhvlər, fleblərin qidalanmasının pozulması və nekrozun yaranması, xəstənin daxili orqanlarında müşahidə edilən xəstəliklər və zəif immun sistem, əməliyyatdan sonra yaranan hematomalar, infeksiyalar və iltihabi proseslər, eləcə də xəstənin əməliyyatdan sonrakı dövrdə kəskin infeksiyalara yoluxması əsas səbəbərdəndir". Həkim reabilitasiya mərhələsinin düzgün aparılmamasını da səbəblər sırasında sadalayıb.

İkincili damaq defektlərinin kliniki xüsusiyyətləri

Həkim qeyd edib ki, bu defektlər klinik baxımdan anadangəlmə damaq yarıqları ilə oxşardır. Belə ki, xəstələr yemək zamanı qidanın burun boşluğuna keçməsindən və nitq problemlərindən şikayətlənirlər. Damaq defektlərinin ətrafında çapıq toxuma yaranır və defektlərin forması müxtəlif olur. Böyük defektlər danışıq funksiyasına ciddi təsir edir və burun-udlaq nahiyəsində xroniki iltihabın inkişafına səbəb ola bilər. Kiçik defektlər isə bəzən ciddi problemlərə səbəb olmasa da, qidanın burun boşluğuna keçmə ehtimalını tamamilə istisna etmir.

Müalicə və əməliyyatın seçimi

İkincili damaq defektlərinin aradan qaldırılması üçün seçilən cərrahi müdaxilə üsulunun defektin ölçüsündən, yerləşdiyi nahiyədən, formasından və ətraf toxumalardakı plastik materialın mövcudluğundan asılı olaraq fərqləndiyini deyən həkim müasir dövrdə az travmatik metodların tətbiqi ilə bu defektlərin əmələgəlmə riskinin azaldıldığını bildirib: "Bu problem hələ də tam həll olunmayıb və elmi araşdırmalar davam etdirilir".

Mütəxəssislər bildirirlər ki, damaq defektlərinin qarşısını almaq üçün ilk əməliyyatın düzgün planlaşdırılması, əməliyyatdan sonra reabilitasiyanın düzgün aparılması və pasiyentlərin infeksiyalardan qorunması vacibdir.