Şəkərli diabeti olan hər 10-cu pasiyent diabetik ayaq yaraları ilə qarşılaşa bilər. Daha ciddi hallar isə diabetik ayaq sindromuna gətirib çıxarır ki, bu da tip 1 diabetdə xəstəliyin 7-10-cu ilində, tip 2 diabetdə isə diaqnoz qoyulan il belə yarana bilər.

Aztibb.az xəbər verir ki, Diabetik Ayaq Mərkəzinin verdiyi məlumata görə, diabetik ayağın əsas səbəbləri neyropatiya (sinir zədələnməsi), angiopatiya (damar problemləri), ateroskleroz (damar tutulmaları) və osteoartropatiyadır (sümük və oynaq dəyişiklikləri).

Xəstəlik ilkin mərhələdə ayaq pəncələrinin hissiyyatının azalması ilə başlayır. Pasiyent ayağında yaranan travmalara, yanmalara və ya dar ayaqqabının yaratdığı diskomforta qarşı həssas olmur. Bunun nəticəsində dəridə mikrotravmalar və sürtünmələr meydana gəlir.

Diabetik ayaq necə yaranır?

Ayaqda əmələ gələn döyənəklər tez bir zamanda xoraya çevrilə bilər. Əgər müalicə vaxtında aparılmazsa, bu xoralar irinli-nekrotik proseslərə, abseslərə və hətta qanqrenaya səbəb ola bilər. Bu isə amputasiya riskini artırır.

Xəstəlikdən necə qorunmaq olar?

- Diabetik pasiyentlər ildə 4 dəfə endokrinoloq, ildə 1 dəfə cərrah, nevroloq və oftalmoloqun müayinəsindən keçməlidirlər.
- Xüsusi ilə diabetik ayaq müalicəsində ixtisaslaşmış mərkəzlərdə müayinə olunmaq tövsiyə edilir.
- Ayaqlara gündəlik baxım edilməli, hər hansı bir yara və ya dəyişiklik vaxtında həkimə bildirilməlidir.
- Rahat, geniş və yumşaq materialdan hazırlanmış ayaqqabılar geyinilməlidir.

Həkimlər diabeti olan şəxslərə ayaq sağlamlıqlarına xüsusi diqqət yetirməyi və profilaktik tədbirlərə əməl etməyi məsləhət görürlər.