Volqoqrad Tibb Universitetinin və Moskva Dövlət Universitetinin tədqiqatçıları prostat xərçəngini müalicə edən modifikasiya edilmiş dərman hazırlayıblar.
Aztibb.az “Journal of Inorganic Biochemistry” elmi jurnalında rusiyalı alimlərin sensasiyalı kəşfi haqqında məqaləyə diqqət çəkib.
Prostat vəzi xərçəngi ən təhlükəli və geniş yayılmış onkoloji xəstəliklərdən biri hesab olunur. Mövcud dərmanlar onun inkişafını ləngidə bilər, lakin əhəmiyyətli yan təsirləri ilə bədənə zərər verirlər. Dünyanın ən yaxşı onkoloqları dərmanların terapevtik təsirini yaxşılaşdırmaq üçün çalışırlar. İnnovativ metodun mahiyyəti dərman vasitəsi olan abirateronun molekullarına rutenium metal ionunun birləşdirilməsindən ibarətdir.
Araşdırmalar göstərib ki, bu birləşmə təkcə xərçəng hüceyrələrinin böyüməsini boğmur, həm də onları tamamilə məhv edir. Eyni zamanda, dərman sağlam toxuma zərər vermir. Metodun effektivliyi ondan ibarətdir ki, abirateron və rutenium xərçəng hüceyrələrinə fərqli təsir göstərir.
Təcrübələr zamanı məlum olub ki, modifikasiya olunmuş preparatın yan təsirlərə yol vermə ehtimalı azdır. Volqoqrad Tibb Universitetinin elmi işlər üzrə prorektoru Denis Babkov yeni preparatın sadəliyini və effektivliyini qeyd edib və onun əsasında yeni effektiv şiş əleyhinə vasitələrin hazırlanacağına əminliyini bildirib.
