Cənubi Danimarka Universitetinin biokimyaçıları maddələr mübadiləsini sürətləndirməyin yolunu tapıblar.

Aztibb.az "Cell Metabolism" jurnalında dərc olunan tədqiqata istinadən yazır ki, bu üsul insanlara arıqlamağa və qan şəkərinin səviyyəsinə nəzarət etməyə kömək edə bilər.  

İnsan arıqladıqda bədən enerjiyə qənaət etməyə başlayır, kalorilərin yanmasını ləngidir. Buna metabolik uyğunlaşma deyilir. Məhz bu səbəbdən ilk bir neçə kiloqramdan sonra arıqlamağa davam etmək çətindir.

Mütəxəssislər bu prosesə xüsusi bir genin, PLVAP-ın təsir etdiyini aşkar ediblər. Dosent Kim Ravnskjaer izah edib ki, normal şəraitdə qaraciyər aclıq dövründə yağ yandırmağa keçir. PLVAP-ı söndürsəniz, o, karbohidratları emal etməyə davam edir və metabolizm aktiv olaraq qalır. Bundan əlavə, bu genin dəyişdirilmiş funksiyası qaraciyərdə piylərin yığılmasının qarşısını alır. Bunun əvəzinə əzələlərə gedir və enerjiyə çevrilir. Bu mexanizm nəinki maddələr mübadiləsini sürətləndirir, həm də şəkər xəstələri üçün faydalı olan qan şəkərinin səviyyəsini aşağı salır.

Tədqiatçılar bildirib ki, bu prosesə nəzarət etməklə, piylənmə və diabet üçün dərmanlar daha təsirli ola bilər. Bu yenilik daha sürətli arıqlamağa və şəkər səviyyənizi daha asan idarə etməyə kömək edəcək dərmanlar hazırlamağa imkan verir.