İstanbulda keçirilən beynəlxalq simpoziumda mədə xərçənginin müalicəsində son inkişaflar müzakirə edilib. İmmunoterapiyadan genetik testlərə, minimal invaziv cərrahiyyədən radioterapiyaya qədər bir çox innovativ üsullar müzakirə edilib. Mütəxəssislər erkən diaqnozun vacibliyini, müalicə prosesində daha effektiv və rahat yanaşmalardan istifadə edildiyini vurğulayıblar.

Aztibb.az "Habertürk"ə istinadən yazır ki, son illər sürətlə yayılan mədə xərçəngi dünyada ən çox rast gəlinən xərçənglər arasında ilk yerlərdədir. Lakin erkən diaqnoz üçün heç bir skrininq üsulu olmadığı üçün daha çox inkişaf mərhələsində diaqnoz qoyulan bu məkrli xəstəlik xərçəngdən ölüm halları arasında üçüncü yerə yüksəlib.

Prof. Dr. Erman Aytaç son illərdə mədə xərçənginin müalicəsində əhəmiyyətli irəliləyişlərin olduğunu bildirib. Xəstələr üçün daha təsirli və rahat üsulların cərrahiyyə, dərman müalicəsi, immunoterapiya və radioterapiya sahələrində istifadə olunmağa başladığını vurğulayan professor qeyd edib ki, artıq əməliyyatları əvvəlki kimi aqressiv aparılmır. Qarında bir neçə kiçik kəsik edərək həyata keçirilən cərrahi əməliyyatlar sayəsində xəstələr daha tez sağalır və həyat keyfiyyəti yüksəlir.

Simpoziumda mədə xərçəngi cərrahiyyəsində minimal invaziv üsulların geniş tətbiqi də müzakirə olunub. Prof. Dr. Aytaç robot cərrahiyyənin açıq əməliyyatlara nisbətən daha sürətli sağalma təmin etdiyini və əməliyyatların böyük kəsiklərə ehtiyac olmadan həyata keçirilə biləcəyini bildirib.

O, həmçinin vurğulayıb ki, çox erkən mərhələdə olan mədə xərçəngini endoskopik üsullarla orqanın tam və ya bir hissəsini çıxarmadan həm diaqnoz qoymaq, həm də müalicə etmək mümkündür.