Bütün xristian dünyasında Milad bayramı xüsusi təmtəraqla qeyd edilir. Əhalisinin mütləq əksəriyyətinin katoliklərdən ibarət olduğu İtaliyada isə bu  bayram mühüm əhəmiyyət daşıyır. İtaliya hökuməti insanların sıx bir araya gəldiyi Milad günlərində sərt karantin qaydaları tətbiq etməklə virusun yayılmasını əngəlləməyə hazırlaşır.

Ölkənin Səhiyyə nazirinin müavini Sandra Zampa ”La Stampa” qəzetinə müsahibəsində yeni qaydalardan bəhs edib. O, qeyd edib ki, Milad bayramının yalnız ən yaxın qohum çevrəsində, yəni birinci dərəcəli qohumlar arasında keçirilməsinə icazə veriləcəkdir. Eyni zamanda, ölkədə insanların sıx toplaşdığı Milad bazarları bu il fəaliyyət göstərməyəcək.

S.Zampanın sözlərinə görə, yaxın müddətdə yoluxmanın artım tendensiyasının qarşısı alınmasa, dünyanın ən güclü səhiyyə sistemi belə pandemiyanın öhdəsindən gəlməkdə aciz qala bilər.

Qeyd edək ki, hazırda İtaliyada koronavirusa gündəlik yoluxma sayı 25 mindən yuxarıdır, ölüm hallarının sayı isə 42 mini ötüb.