Mentol (nanə) qoxusu Alzheimer xəstəliyinin bəzi əlamətlərini yüngülləşdirə bilər. Bu qənaətə Edinburqdakı Napier Universitetinin alimləri genetik modifikasiya olunmuş laboratoriya siçanları üzərində apardıqları bir sıra təcrübələrdən sonra gəliblər.

Aztibb.az “The Conversation” nəşrinə istinadən xəbər veri ki, tədqiqatçılar altı ay ərzində mentolun Alzheimer xəstəliyinin əlamətləri olan siçanlara təsirini öyrəniblər. Təcrübələr nəticəsində alimlər mentolun heyvanların idrak qabiliyyətlərini əhəmiyyətli dərəcədə yaxşılaşdırdığını aşkar ediblər.

Bundan əlavə, mentol qoxusu immunitet sisteminə tənzimləyici təsir göstərir ki, bu da koqnitiv zəifləmənin qarşısını almağa kömək edə bilər.

Tədqiqatın əsas məqamlarından biri mentolun təsiri altında beyində interleykin-1 beta səviyyəsinin azalması olub.

Bu zülal iltihabda mühüm rol oynayır və Alzheimer xəstəliyində koqnitiv zəifləmə ilə əlaqələndirilir.

Qeyd etmək vacibdir ki, tədqiqat nəticələri laboratoriya siçanlarında əldə edilmişdir və onların insan orqanizminə tətbiq oluna biləcəyini təsdiqləmək üçün əlavə klinik tədqiqatlar tələb olunur.