Amerikalı alimlər insan südündə olanlara bənzər qida elementləri yarada bilən geni dəyişdirilmiş bitki təqdim ediblər.

Aztibb.az “Nature Food” nəşrinə istinadən xəbər verir ki, Berklidəki Kaliforniya Universitetinin alimlər qrupu təcrübə üçün Nicotiana benthamiana kolunu seçib. Adi tütünə yaxın olan bu bitki Avstraliyada bitir.

Bitkidə şəkər istehsal mexanizmi yenidən proqramlaşdırılıb. Sadə şəkər (monosakkaridləri) insan ana südündə olanlara bənzər mürəkkəb şəkərlərin budaqlanmış zəncirlərinə birləşdirməkdən məsuldur. Bu maddələr faydalı bağırsaq bakteriyalarının inkişafına kömək edir və yeni doğulmuşlarda immunitet sisteminin gücləndirilməsinə xidmət edir.

Təcrübələr zamanı məlum olub ki, geni dəyişdirilmiş tütün ana südündə də mövcud olan 11 tanınmış oliqosakkaridi yaradır. Xatırladaq ki, təbii ana südünün tərkibində körpələrin sağlamlığını qorumağa kömək edən 200-ə yaxın müxtəlif oliqosakarid var.

Mütəxəssislərin fikrincə, yenilik körpələr üçün təbii qidaya bənzər körpə süni qidaların istehsalına başlamaqda kömək edə bilər.