Türkiyənin yerli peyvəndinin insanlar üzərində ilk sınağı Kayseri Erciyes Universitetində aparılıb. Peyvəndin ikinci dozası 21 gün sonra tətbiq olunacaq.

Aztibb.az medimagazin.com.tr-yə istinadla xəbər verir ki, peyvəndin 28 və 42-ci günlərində ediləcək testlərlə onun qoruyuculuğu müəyyən olunacaq.

1-ci mərhələnin təxminən 2 ay davam edəcəyi gözlənilir. Peyvəndin bütün mərhələləri uğurlu keçərsə, o, tətbiq oluna bilər. Yoluxucu xəstəliklər üzrə mütəxəssisi prof. Dr. Mehmet Ceyhan bu mərhələdə işlərinin 40-50 xəstə üzərində aparıldığını və təhlükəsiz hesab edilərsə tətbiq ediləcəyini söyləyib.

M.Ceyhan ikinci mərhələdəki peyvəndin təhlükəsiz olduğu və yan təsirləri araşdırıldıqdan sonra 2-ci mərhələyə keçiriləcəyini, bu mərhələdə yüzlərlə insanın iştirak edəcəyini bildirib:

"Heç bir problem aşkar olunmazsa 3-cü mərhələ üzrə işlərə başlanılacaq. Sonuncu mərhələdə sınaqlar on minlərlə insan üzərində aparılır və burada əsas məqsəd peyvəndin effektivliyini görməkdir".

M.Ceyhan peyvəndin bütün bu mərhələlərinin təxminən səkkiz ay çəkdiyini bildirib. Qeyd edib ki, bütün mərhələlərdən sonra peyvəndin effektivliyi sübut olunarsa və ciddi bir yan təsiri olmazsa peyvənd vətəndaşlar üzərində tətbiq olunacaq.