“MedicalXpress” elmi jurnalı insan papillomavirusu (HPV) peyvəndinin kişilərdə və qadınlarda xərçəngin qarşısını aldığını müəyyən edən amerikalı alimlərin araşdırmasının nəticələrini dərc edib.

Aztibb.az jurnala istinadən xəbər verir ki, ilkin olaraq, peyvənd zərif cinsin nümayəndələri arasında uşaqlıq boynu xərçənginin qarşısını almaq üçün hazırlanmışdır.

Nəşrin məlumatına görə, yeni araşdırmada alimlər peyvənd edilmiş kişilərdə ağız və boğaz xərçənginə tutulma riskinin peyvəndi almayanlara nisbətən daha az olduğu qənaətinə gəliblər. Təcrübə zamanı tədqiqatçılar eyni yaşda olan 3.400.000-dən çox insanın məlumatlarını təhlil ediblər. Onların yarısına peyvənd vurulub. Alimlər peyvənd olunan qadınların peyvənddən sonra ən azı beş il ərzində uşaqlıq boynu xərçənginə tutulma riskinin daha az olduğunu bildiriblər.

Eyni zamanda, peyvəndi alan kişilərdə HPV ilə əlaqəli hər hansı bir xərçəngə tutulma riski aşağı olub. ÜST-ün statistikasına görə, bütün dünya əhalisinin 9-13%-i insan papillomavirusuna yoluxmuşdur ki, bu da təxminən 630 milyon insana bərabərdir. Qadınlar arasında papilloma virusuna yoluxma halları 50% təşkil edir. Bu günə qədər insan papillomavirusunun 80-dən çox ştamının mövcudluğu məlumdur, onların hamısı dərinin və selikli qişaların səthi epitelinə təsir göstərir.