Yayda aktiv günəş çox zərər verə bilər. Məsələn, günəş yanığı yalnız ağrı və dərinin soyulması şəklində narahatlığa səbəb olmur, həm də saçınızın tökülməsinə gətirə bilər.

Aztibb.az “Gazeta” nəşrinə istinadən xəbər verir ki, trixoloq Mariya Vasilyevanın izah etdiyi kimi, yayda saç və baş dərisi xüsusi qayğıya ehtiyac duyur.

Günəş saçın sağlamlığına necə təsir edir?

Ultrabənövşəyi şüaların aqressiv təsirindən ilk olaraq baş dərisi əziyyət çəkir.

Həkim qeyd edib ki, baş geyiminin olmaması yanıqlara səbəb ola bilər ki, bu da öz növbəsində saç tökülməsinə yol açır:

"Ona görə də günəşli günlərdə papaq (boş və təbii materiallardan hazırlanmış) taxmaq və saç xətti boyunca günəşdən qoruyucu krem çəkmək tövsiyə olunur".

Həkim onu da əlavə edib ki, SPF qoruyucusu olan şampunlar və kondisionerlər şəklində saç baxımınızı tamamlaya bilərsiniz. İstidə isə saç nəmini itirir, quruyur, mat və kövrək olur. Buna görə də qulluqunuzu keratin, hialuron turşusu və yağlar olan kondisionerlərlə tamamlamalısınız.

Ümumiyyətlə, ultrabənövşəyi radiasiyanın iki növü var: UVA və UVB. Birincisi saçları aktiv şəkildə qurudur, ikincisi isə piqmenti məhv edir.