Salk Bioloji Tədqiqatlar İnstitutunun amerikalı mütəxəssisləri panik atak hücumlarının "beynin həyəcan mərkəzi" deyilən yerdə - lateral parabraxial nüvədə (PBL) meydana gəldiyini aşkar ediblər. Beynin bu sahəsi tənəffüs, nəbz və bədən istiliyinə nəzarət edir.

Aztibb.az xəbər veri ki, “Nature Neuroscience” jurnalında dərc olunan məqaləyə görə, mütəxəssislər siçanların beyinlərini tədqiq ediblər. Məqsəd panik atak zamanı şiddətli narahatlıq hücumunun başlanğıcının hansı strukturlarda verildiyini öyrənmək olub.

Əvvəllər, bu fenomen üçün amigdalanın məsuliyyət daşıdığına inanılırdı, hətta beynin qorxu mərkəzi adlanırdı. Lakin beyin sapında yerləşən lateral parabraxial nüvəni (PBL) tədqiq edərkən mütəxəssislər bu sahənin panik pozğunluğun emosional və fiziki əlamətlərinin formalaşmasında da iştirak etdiyini müəyyən ediblər.

Təcrübə zamanı siçanlar panik atak hücumunu simulyasiya etmək üçün təhrik edilib, bu da hücum zamanı PACAP ifadə edən neyronların aktivləşdiyini göstərib. Daha sonra onlar PACAP reseptorları olan neyronların yerləşdiyi dorsal nüvə adlanan beynin sahəsini aktivləşdiriblər. Elm adamları bu reseptor neyronları üzərində hərəkət etdikdə, siçanlar tənəffüs və ürək döyüntülərinin artması, ardınca panik reaksiyaları yaşayıblar.

Alimlər bu qənaətə gəliblər ki, PACAP siqnallarının ötürülməsini süni şəkildə əngəlləməklə panik atakı dayandırmaq mümkündür. Onlar bu sahədə araşdırmaları davam etdirmək niyyətindədirlər.