Gözəllik dünyasında yeni trend olan göz rənginin əməliyyatla dəyişdirilməsi ilə bağlı xəbərdarlıq edilib.

Aztibb.az CNN-ə istinadən xəbər verir ki, mövzunun müzakirəsinə qoşulan mütəxəssislər gözün rəngini dəyişdirərkən görmə qabiliyyətinin itə biləcəyi təhlükəsinə diqqət çəkiblər.

Tibbdə göz rənginin dəyişdirilməsi əməliyyatlarına “keratopiqmentasiya” deyilir. Bu, adətən infeksiya və ya zədə nəticəsində gözün buynuz qişasında (şəffaf ön hissədə) çapıqların qalması və ya irisin düzgün formalaşmaması səbəbindən edilir.

Bununla belə, TikTok-da insanlar gözlərinin rəngini dəyişdirən videolarını paylaşdıqdan sonra bu, estetikada yeni bir tendensiyaya çevrilib.

Qəhvəyi gözlər əməliyyatla adətən mavi və yaşıl rəngə çevrildiyi halda, mütəxəssislər prosedura görə insanların görmə qabiliyyətini itirə biləcəyi barədə xəbərdarlıq ediblər.

Britaniyalı göz cərrahı Aleks Day “Guardian” qəzetinə açıqlamasında deyib: “Sırf kosmetik səbəblərdən təsadüfi yerlərdə gözlərinin rəngini dəyişməyə çalışan insanlar korluğa qədər problemlər yaşaya bilərlər.

“Keratopiqmentasiya cərrahın lazer və ya iynədən istifadə edərək buynuz qişanın kəsilməsini və içinə rəngləmə piqmentinin yeridilməsini əhatə edir. Bu piqmentlər gözün təbii rəngini maskalayaraq rəngin dəyişməsinə səbəb olur. Heç kim estetik səbəblərdən göz rəngini dəyişdirmək üçün əməliyyat keçirərək görmə qabiliyyətini riskə atmamalıdır. Həqiqətən istəyirsinizsə, kontakt linzalardan istifadə edin. Obyektivi internetdən yox, keyfiyyətli istehsalçıdan alın”, - cərrah vurğulayıb.

Amerika Oftalmologiya Akademiyası da keratopiqmentasiya və implant əməliyyatı kimi tanınan başqa bir göz rəngini dəyişdirmə texnikası haqqında xəbərdarlıq edərək, prosedurların görmə itkisi və ağırlaşmalarla bağlı ciddi risklər daşıdığını bildirib.

"Keratopiqmentasiya risklərinə işığa həssaslıq, görmə itkisinə səbəb ola biləcək buynuz qişanın zədələnməsi, infeksiyalar, gözə boya sızması və boyaya qarşı iltihab daxildir. Bu prosedurları sırf kosmetik səbəblərə görə düşünənlər bu ciddi riskləri göz önünə almalıdırlar", - təşkilatın açıqlamasında deyilir.

Bu ay İspaniyada keratopiqmentasiya üzrə birinci dünya konqresinin keçiriləcəyi bildirilir. Konfransa sədrlik edən və metodu inkişaf etdirən İspaniyanın Miguel Hernández Universitetinin oftalmologiya professoru Xorxe Alio keratopiqmentasiya prosesinin kosmetik istifadəsi üçün cərrahi protokol hazırlanacağını açıqlayıb:

“Estetik səbəblərdən göz rənginin dəyişdirilməsi tələbib artymaqdadır. Ancaq bu, linzalardan istifadə kimi deyil. Prosedur yaxşı təlim keçmiş kornea cərrahları tərəfindən aparılmalıdır. Buynuz qişaya vurulan piqmentlər təhlükəsiz olmalıdır”.