Fiziki məşq insan orqanizminə, o cümlədən beyinə qan tədarükünə müsbət təsir göstərir. İova Universitetindən elm adamları, bu məqsədlə təcrübə aparıblar.

Aztibb.az xəbər verir ki, bununla bağlı tədqiqatın nəticələri, “Journal of Applied Physiology” (JAPRL) jurnalında dərc edilib.

Məqalədə qeyd olunur ki, təcrübədə oturaq həyat tərzi keçirən, həmçinin qan təzyiqi və ya hipertoniyası bir qədər yüksəlmiş 40-64 yaşlı 28 könüllü iştirak edib.

Bu insanlar iki qrupa bölünüb: birinci qrup üç ay ərzində mütəxəssislərin nəzarəti altında aerobik idmanla məşğul olmalı, ikinci qrup isə düzgün qidalanmaya riayət etməli və istənilən uyğun fiziki fəaliyyətlə məşğul olmalı idi.

Üç ay sonra elm adamları birinci qrupdakı iştirakçılarda iş yaddaşı və fiziki dözümlülük kimi göstəricilərdə nəzərəçarpacaq irəliləyişlər qeydə alıblar. Tədqiqatçıların fikrincə, bu, beyinə qan axınının yaxşılaşmasının nəticəsidir.