İcbari Tibbi Sığorta üzrə Dövlət Agentliyinin sədri Zaur Əliyev tibbi sığortanın elektronlaşması məsələsi ilə bağlı bəzi məqamlara diqqət çəkib.
Aztibb.az xəbər verir ki, informasiyaların vaxtında çatdırılması baxımından elektronlaşmanın əhəmiyyətinə toxunan sədr qeyd edib ki, son 10-15 ildə tibb müəssisələrinin qurulmasına investisiya qoyulsa da elektronlaşma bir qədər gecikirdi. O, TƏBİB tabeli tibb müəssisələrində elektronlaşmanın son 3-4 ildə aparıldığını deyib. Z.Əliyev çıxışında onu da vurğulayıb ki, məlumata görə, 1 ay ərzində 1 milyondan çox pasiyent müraciət edib. Vətəndaşlara 3 milyondan çox xidmət göstərilib. 5 milyondan çox transaksiya həyata keçirilib.
Qeyd edək ki, bu fikirlər ABŞ-nin “Səhiyyə İnformasiya və İdarəetmə Sistemləri Cəmiyyəti” (HIMSS) təşkilatı ilə əməkdaşlıq nəticəsində ölkəmizdə ilk dəfə Yeni Klinikanın “HIMSS”in önəmli yetkinlik modulu hesab olunan “Elektron Tibbi Qeydiyyatın Qəbul Modulu” (EMRAM) üzrə VI səviyyə sertifikasiyanın tələblərinə uyğunluğunun təsdiqlənməsi ilə bağlı keçirilən görüşdə bildirilib.