Ayaq barmaqlarının şişməsi və göyümtül rəngi, eləcə də ətrafların şişməsi insan orqanizminin ürək-damar sisteminin müəyyən xəstəliklərinin inkişafından xəbər verir.

Aztibb.az xəbər verir ki, bu barədə “Daily Mirror” məlumat yayıb.

Terapevt Con Kamminsin fikrincə, ayaqların şişməsi, barmaqların göyərməsi və barmaqlarındakı ağrılı qabarmalar çox vaxt qan dövranının zəif olmasının göstəricisidir:

“Ürək səmərəli işləmədikdə, qan ətraflarda toplana bilər və ayaqlarda maye tutulması kimi simptomlara səbəb ola bilər. Mən şəxsən təcrübədə müşahidə etmişəm ki, mavi barmaqlar qanda oksigen çatışmazlığından xəbər verir ki, bu da ürək problemlərinin mümkün əlamətlərindəndir”.

Ayaqlarda şişkinlik və digər xarici dəyişikliklərin ikinci dərəcəli əlamət olduğu izah edilir. Ürək problemlərinin ilk və əsas əlaməti kəskin sinə ağrısıdır, xüsusən də bu fiziki fəaliyyət zamanı baş verirsə.

“Mənim ən böyük sağlamlıq məsləhətim odur ki, ürək-damar xəstəliklərinin erkən aşkarlanması və müalicəsi nəticələri əhəmiyyətli dərəcədə yaxşılaşdırır. Ona görə də mütəmadi olaraq həkim müayinəsindən keçin”, - deyə terpevt yekunlaşdırıb.