Amerika Kolumbiya Universitetinin Tibb Mərkəzinin alimləri bəzi qidaların istehlakı ilə qadınlarda yuxusuzluq arasında əlaqəni aşkar edən araşdırma aparıblar.
Aztibb.az xəbər verir ki, mütəxəssislər öz işlərini AJCN (The American Journal of Clinical Nutrition) jurnalında təqdim ediblər. Mütəxəssislər 50 000-dən çox yetkin könüllünün yemək vərdişlərini təhlil ediblər. Makaron, ağ düyü, ağ çörək və bişmiş məmulatlar kimi yüksək işlənmiş qidaların istehlakının yuxu pozğunluğuna səbəb ola biləcəyi müəyyən edilib.
Düyü, makaron və çörəyin həddindən artıq emal edilməsinin orqanizm üçün mütləq zərərli olduğu sübut olunmuş bir həqiqətdir. Belə ki, bu qida maddələrinin tərkibində olan təmizlənmiş şəkər qan damarlarını və ürəyi zədələyir, iltihabi prosesləri və bir sıra xəstəlikləri təhrik edir. Yan təsirlərdən biri də gecə yuxuya getmə və oyanma problemidir.
Bu cür məhsulları daha təbii olanlarla, təbii şəkərlə, məsələn, meyvələrlə əvəz etmək daha yaxşıdır. Diyetoloqlar ağ düyü və makaron əvəzinə qarnir kimi tam taxıl məhsullarını tövsiyə edirlər.