Amerika Kardiologiya Kollecinin yeni araşdırması nəticəsində məlum olub ki, yumurta, məşhur inancın əksinə olaraq, xolesterolu artırmır və ürək sağlamlığına zərər vermir.

Aztibb.az “Planet Today” nəşrinə istinadən xəbər verir ki, təcrübədə ürək-damar xəstəlikləri riski yüksək olan 140 xəstə iştirak edib.

Təcrübə iştirakçıları iki qrupa bölünüblər. Birinci qrup həftədə 1-2 yumurta, digər qrup isə - 12 yumurta istehlak edib. Qeyd edək ki, bu yumurtalar D, B vitaminləri həmçinin minerallar və omeqa-3 yağ turşuları əlavə edilmiş gücləndirilmiş yumurtalar olub.

Tədqiqatçılar aşağı sıxlıqlı (“pis”) və yüksək sıxlıqlı (“yaxşı”) xolesterol səviyyələrini qeyd ediblər. Dörd ay ərzində subyektlərin ürək-damar sağlamlığının digər göstəriciləri də izlənilib.

Gücləndirilmiş yumurta qrupunda həm yaxşı, həm də pis xolesterin səviyyələrində bir qədər azalma müşahidə edilmişdir. Bu qrupdakı iştirakçıların ürək zədələnməsi və insulin müqavimətinin göstəricilərində də azalma aşkar edilib. Eyni zamanda, onların qanında vitamin səviyyəsi yüksəlib.

Sual olaraq qalır, bəs yumurtaların təhlükələri ilə bağlı davamlı qərəz haradan qaynaqlanır?

Alimlər və həkimlər belə bir nəticəyə gəliblər: görünür, xolesterol səviyyəsinə mənfi təsir göstərən yumurtaların özləri deyil, onları "müşayət edən" qidalar - kərə yağı, ət ilə tost olub ki, bu da ürəyə zərərlidir.