Piylənmə ilə bağlı görülən tədbirlərə “saf meyvə şirələri” də əlavə edilməyə başlandı. Araşdırmada təmiz meyvə suyu qəbul edən uşaqlarda çəki artımı aşkar edilib.
Aztibb.az “CNN Turk”ə istinadən xəbər verir ki, kanadalı tədqiqatçılar tərəfindən aparılan sistematik araşdırma və meta-analiz nəticəsində məlum olub ki, təmiz meyvə şirəsinin uşaqlar üçün gündəlik normadan artıq istehlakı bədən kütləsi indeksinin artmasına səbəb ola bilər.
Toronto Universitetinin Qidalanma Elmləri Departamentindən Vasanti Malik və onun həmkarları gündəlik qəbulundan əlavə təmiz meyvə şirəsi içən uşaqlar və böyüklər haqqında məlumatları ehtiva edən 42 araşdırmanı araşdırıblar.
Tədqiqatçılar təmiz meyvə suyu qəbul edən uşaqların bədən kütlə indeksinin 0,03 artdığını bildiriblər. Müayinə nəticəsində 11 yaşdan kiçik uşaqlar tərəfindən istehlak edilən hər əlavə 240 millilitr meyvə şirəsinin bədən kütləsi indeksində daha böyük fərqə səbəb olduğu müşahidə edilib. Yetkinlərin şəkər əlavə edilmədən təmiz meyvə şirəsi qəbul etməsi ilə çəki artımı arasında əlaqə olduğu da məlum olub.
