Novruz tətili uzun olduğundan adətən işgüzar insanlar tətildən sonra işə alışıncaya qədər psixoloji narahatlıqla üzləşirlər.

Aztibb.az xəbər verir ki, psixoloq Günay Kərimi istirahət, tətil, bayram günlərindən sonra həm fiziki, həm də zehni dincəlməyin çox vacib olduğunu tövsiyə edir.

“Ancaq tətil bitdikdən sonra yenidən iş rejiminə qayıtmaq, adaptasiya olmaq bəzilərimizə çox çətin gəlir. Tətildən sonra işə adaptasiya ola bilməməyimiz gördüyümüz işə də öz mənfi təsirini göstərir”, - deyə mütəxəssis bildirib.

Onun sözlərinə görə, insanlar tətil zamanı bol qidalanmağa, yatmağa üstünlük verirlər. Ona görə, işə başlayarkən ən çox yuxusuzluqdan əziyyət çəkirlər.

“Təbii ki, işə adaptasiya ola bilməyən insanda ilk gün yorğunluq, halsızlıq, həvəssizlik, əsəbilik halları da olur. İşini çox sevən insanlarda isə bu hallara rast gəlinmir. Çünki onlar işin başlamasını həvəslə gözləyirlər, ona görə də daha tez adaptasiya ola bilirlər”.

Psixoloq qeyd edib ki, adaptasiya problemi yaşayan insanlar buna psixoloji hazır olmalıdırlar. İlk iş günündən başlayaraq çox işləyib özlərini yormamalı, ağır iş rejiminə girməməlidirlər. Çünki zehnimizi aram-aram bu rejimə hazırlamalıyıq. Əks halda tətil zamanı yığdığımız enerjini da daha tez xərcləmiş olarıq. Bu zaman da işə adaptasiya olmaqda çətinlik çəkəcəyik.