Fibromialgiya sindromu diffuz əzələ ağrıları və zəiflik ilə ortaya çıxan xroniki bir ağrı sindromudur.

Aztibb.az-a Bakı Bərpa Mərkəzindən verilən məlumata görə, xəstəliyin ən əsas simptomu geniş yayılmış əzələ ağrılarıdır və insanların gündəlik həyat keyfiyyətinin əhəmiyyətli dərəcədə azalmasına səbəb olur. Digər simptomlarına da zəiflik, halsızlıq, yuxu pozğunluğu, iş vaxtının azalması, bağırsaq fəaliyyətinin pisləşməsi, səhər yuxudan yorğun oyanmaq və sərtlik daxildir.

Fibromialgiya müalicəsi üçün çoxşaxəli bir yanaşma tələb olunur. Müalicə proqramı revmatoloji mütəxəssisi, fizioterapiya və reabilitasiya mütəxəssisi, psixoloq, peşə terapevti, fizioterapevt ilə əməkdaşlıqda təyin olunmalı və həyata keçirilməlidir.

Zərurət olduqda digər şöbə həkimlərindən məsləhət dəstəyi alınır və müalicə çoxşaxəli bir istiqamətə yönəldilir.

Dərman terapiyasına əlavə olaraq, məşq, masaj, fizioterapiya tətbiqləri də müalicə proqramına daxil edilə bilir. Müalicə ağrı və yorğunluğu azaltmaq, depressive simptomları aradan qaldırmaq və digər simptomları minimum endirmək üçün planlaşdırılır.

Fibromialgiya geniş yayılmış bir xəstəlik olmasına baxmayaraq, sadəcə xəstələrin 1/3-də diaqnoz edilə bilər. Xəstəliyin müalicəsində sağlam qidalanma, müntəzəm məşq, istirahət təsirli olur, lakin avtonom sinir sistemini tənzimləmək üçün fizioterapiya və reabilitasiya proqramlarına ehtiyac duyulur.

Adətən 20-40 yaş arasında meydana gələn bu xəstəlik qadınlarda kişilərə nisbətən 7 dəfə çoxdur. Həyatı dözülməz hala gətirən bu narahatlıqda bəzi xəstələr ağrıkəsicilər, masaj, yüngül məşqlər, akupunktur kimi müxtəlif müalicə üsulları ilə rahatlama tapa bilərlər.

Əgər göstərilən fibromiologiya simptomlarını özünüzdə hiss edirsinizsə dərhal həkimə müraciət edin!