A vitamini psixi pozğunluqlar zamanı beyindəki sinir əlaqələrini dəyişdirir
Nyukasl Universitetindən bir qrup elm adamı, A vitamini və ya retinol səviyyəsinin artması və ya azalmasının şizofreniya və digər xəstəliklər zamanı beyindəki sinir əlaqələrinin dəyişməsi ilə əlaqəli ola biləcəyini müəyyən edib.
Aztibb.az xəbər verir ki, araşdırmanın nəticələri “Nature” jurnalında dərc olunub.
Vitamin A kimyəvi quruluşa görə oxşar maddələrin ümumi adıdır, bunlara retinol (vitamin A1, akseroftol) və oxşar bioloji aktivliyə malik digər retinoidlər daxildir. Tədqiqat müəlliflərinin qeyd etdiyi kimi, o, beyin hüceyrələrinin diferensiasiyasında, yetişməsində və sinaptik funksiyasında mühüm rol oynayır. Beyindəki neyronlar arasındakı əlaqənin şizofreniya və digər psixi pozğunluqları olan insanlarda dəyişdiyinə inanılır.
Alimlər bunun orqanizmdə A vitamininin müxtəlif səviyyələri ilə bağlı ola biləcəyini irəli sürüblər. Tədqiqatda onlar retinolun qan səviyyələrini, həmçinin onun udulmasını və daşınmasını hansı genetik faktorların tənzimlədiyini öyrənmək üçün minlərlə fərdi genomun ümumi statistikasını birləşdiriblər.
Daha sonra alimlər orqanizmdə retinolun yüksək konsentrasiyasını saxlamaqla əlaqəli vəziyyəti öyrəniblər.
Tədqiqat müəlliflərinin fikrincə, bu yanaşma psixi pozğunluqların patogenezində daha çox sayda faktoru müəyyən etməyə imkan verir. Alimlər retinolun neyroprotektiv təsir göstərə biləcəyini irəli sürüblər. Bu, onun şizofreniyada antipsikotiklərə potensial köməkçi kimi istifadəsini izah edir.