Hətta aşağı səviyyədə fiziki fəaliyyət də insultun qarşısını ala bilir

İtaliyanın L'Aquila Universitetinin tədqiqatçılarının rəhbərlik etdiyi bir qrup, asudə vaxtda hətta kiçik fiziki fəaliyyətin belə insult ehtimalını azalda biləcəyini müəyyən edib.

Aztibb.az xəbər verir ki, tədqiqatın nəticələri “Journal of Neurology, Neurosurgery & Psychiatry” jurnalında dərc olunub.

Tədqiqatçıların araşdırması fiziki hərəkətliliyin müəyyən səviyyələri ilə insult riski arasındakı əlaqəni izləyən əvvəlki 15 tədqiqatın meta-analizi olub. Qeyd olunur ki, tədqiqatlarda ümumilikdə 752 000-dən çox yetkin könüllü iştirak edib.

Asudə vaxtda fiziki fəaliyyətin ürək-damar xəstəliklərinin inkişaf riskinə təsirini qiymətləndirən beş tədqiqatın məlumatlarının birləşdirilmiş təhlili göstərib ki, praktiki olaraq heç bir hərəkət etməmə ilə müqayisədə yüksək hərəkətlilik insult riskini 29% azaldır. Bununla belə, daha az həcmdə həyata keçirilən bəzi fəaliyyətlər (həftədə 150 dəqiqədən az) bu riski 18% azaldır.

Alimlər izah edbilər ki, hətta aşağı intensivlikli fəaliyyət (gəzinti, yavaş velosiped sürmə) ürək-damar sisteminin fəaliyyətini yaxşılaşdırır və uzun müddətdə insultun qarşısını almağa kömək edir. Bu səbəbdən heç bir növ fiziki fəaliyyətdən imtina etməməlisiniz.