Rusiyalı politoloq hamilə qadınlara və uşaqlı böyüklərə siqaret satışının qadağan edilməsinə çağırıb.
Aztibb.az “Gazeta” nəşrinə istinadən xəbər verir ki, “Rusiyada hamilə qadınlara və uşaqlı böyüklərə tütün məmulatlarının satışı məhdudlaşdırılmalıdır”, – deyən politoloq Anton Orlov bu mövzuda məktubunu səhiyyə naziri Mixail Muraşkoya göndərib.
O, müraciətində xatırladıb ki, Rusiyada son bir neçə ildə tütün çəkmə və tüstünün uşaqlara təsirini azaltmaq üçün bir sıra aktlar qəbul edilib. Belə ki, siqaretin reklamı, piştaxtada tütün məmulatlarının açıq nümayişi, ictimai yerlərdə siqaret çəkmək qadağan edilib.
Qeyd edib ki, bununla belə, tütün məmulatlarının pərakəndə satışında qeyri-müəyyən hallara yol verilir. O, onların arasında hamilə qadınlara siqaret satışını da əlavə edərək, siqaretin doğulacaq uşağın sağlamlığına zərər vurduğunu, onun fiziki, o cümlədən intellektual inkişafına mənfi təsir göstərdiyini vurğulayıb.
O, bu kateqoriyadan olan vətəndaşlara tütün və nikotin tərkibli məhsulların satışına qadağa qoyulmasını nəzərdə tutan federal qanunvericilik və qaydalara dəyişikliklərin edilməsini təklif edib.
Politoloq tütün məmulatlarının satışı ilə bağlı lövhələr yerləşdirən ticarət obyektlərinə də məhdudiyyət qoyulmasına çağırıb.