Qan zəhərlənməsi kimi tanınan sepsisə immun sistemi zəif olan insanlarda daha çox rast gəlinir.

Aztibb.az “TRT Haber”ə istinadən xəbər verir ki, bununla bağlı professor İlyas Dökmetaş bəzi tövsiyələrini verib.

Onun sözlərinə görə, qan zəhərlənməsi daha çox şəkər xəstələri, böyrək çatışmazlığı olanlar, siroz xəstələri, dalaq əməliyyatı keçirmiş və ya anadangəlmə dalağı olmayanlar, QİÇS və xərçəng xəstələri, yaşlı insanlar kimi bədən müdafiə sistemləri pozulmuş insanlar və kortizon müalicəsi alanlarda müşahidə oluna bilər.

Sepsisin müalicəsində ən mühüm meyar simptomların göründüyü andan 1 saat ərzində dərhal müalicəyə başlamaqdır. Çünki müalicəyə nə qədər gec başlansa, ölüm nisbəti bir o qədər yüksəkdir.

Professor müalicə prosesini belə ümumiləşdirib:

“O, təkcə mikrob əleyhinə dərmanlarla müalicə olunmur. Dəstəkləyici müalicə də aparılmalıdır. Məsələn, tənəffüs dəstəyi tələb oluna bilər. Xəstəyə oksigen verilməli və ya intubasiya edilməlidir... Qan təzyiqi çox aşağı düşdükdə onu artıran dərmanlar əlavə edilə bilər. Yaxud, ürək döyüntüsü artarsa, dərhal tənzimlənməlidir”.