Danimarkalı ornitoloqlar tərəfindən aparılan araşdırma nəticəsində məlum olub ki, quşların nəğmə oxuması onların səslərinin keyfiyyətini və cəlbediciliyini qoruyub saxlamaqda mühüm rol oynayır.

Aztibb.az xəbər verir ki, “Nature Communications” jurnalında dərc edilən bu araşdırma, uzun müddət mahnı oxumamağın səs əzələlərinin zəifləməsinə və səslərin keyfiyyətinin aşağı düşməsinə səbəb olduğunu müəyyən edib.

Alimlər quşlar tərəfindən belə bir davranışın təkcə ərazini qorumaq və ya tərəfdaşları cəlb etmək ehtiyacından deyil, həm də səs qabiliyyətini qorumaq ehtiyacından qaynaqlana biləcəyini irəli sürüblər.

Zebra ispinozları (hind bülbülü) ilə aparılan təcrübələr göstərib ki, oxuya bilməmək səs əzələlərinin sürətlə zəifləməsinə səbəb olub. Uzun müddət oxumaq qabiliyyətindən məhrum olan quşlar səs aparatlarının səmərəliliyini itiriblər və tərəfdaşlar üçün daha az cəlbedici olublar.

Tədqiqatın nəticələri təkcə quşların davranışını anlamaq üçün deyil, həm də insan səsi üçün əhəmiyyətli nəticələrə malikdir. Nəğmə oxuyan quşlarda olduğu kimi, insanlarda uzun müddət susmaq səs qabiliyyətinin itirilməsinə səbəb ola bilər.

Bu kəşf insanlarda, o cümlədən peşəkar müğənnilərdə xəstəlik və ya əməliyyatdan sonra səs problemi yaşayan insanlarda səs təlimi və bərpası üsullarının işlənib hazırlanmasına kömək edə bilər.